(Us dr Sicht vo Steffu)
16.00
Ou – Esther u Chöisu warte scho bi üs vor em Hus – mir si z’spät.
Sekunde später…
Was macht de dä Schiltrac mit däm gladne Schilter uf üsem Parkplatz?
(hie no bim Tom u Hans daheime)
16.01
Sälü Esther, sälü Chlöisu, sorry mir si z’spät, wartet dir scho lang? Chlöisu: Nei mir si o grad cho!
16.03
Chlöisu: Steffu, du muesch üs dä renoviert Schilter 1000 fotografiere. Isch kes Problem, wo weimer? I ga grad d’Kamera ga hole.
16.04
I chume ume Husegge…, läck was machet de dir da? Di ganzi Terrasse vou Lüt. I bi grad chli baff. Da het sich ja z’ganze Schilterteam versteckt. Sälu Beni, tschou Tinu, tschou Küsu, sälu Tom, sälu Sabrina und Michu, e lue d’Mariann isch o da, dr Hans o, Selina tschou, sälü Rös. Iz bini würklech sprachlos!
16.15
Chlöisu: Chumm Steffu mir lade dr Schiuter ab. Ja, wo weimer dä Schilter fotografiere? Tom fahrt dr Schilter ungerdesse uf d’Strass use. Chlöisu: Aber zersch nämer no äs Apéro (das hei si übrigens o grad säuber mit gno). Isch guet. Proscht!
16.28
Ä chli später, Chlöisu redt: Los Steffu, du chasch dä Schiuter iz fotografiere oder mache mit ihm was wosch, aber uflade tüe mir’ne nümme, dä blibt da bi öich. Weit dir mi vera…? – das gloubi nid! Mou, das isch ke Witz, dä g’hört öich! Das cha nid si… u so isches no äs zytli unglöibig hin u här gange.
16.40
Los, chömet, dä Momänt wei mir mit äre Foto feschthaute.
von v. n. h., von l. n. r.
Esther, Chlöisu, Patrice, Evi, Steffu, Sarah, Sina, Selina, Mariann, Rös, Sabrina, Beni, Michu, Tom, Hans (leider nicht sichtbar), Küsu und Tinu.
17.12
Tom: Chumm Steffu, iz weimer ä chlini Probefahrt ga mache. Ou, i cha nümm gschaute fahre ig aus «Outomatfahrer», u läck au di Heble u Chnöpf, für was si die aues? U los isches gange, im Quartier hingere u füre.
17.20
U nächhär simer, wis für Schilterfründe ghört, gmüetlech zäme ghocket u hei no lang diskutiert, philosophiert u gfachsimplet.
Spät am Abe
Z’Evi u Ig, si gäng wider iz Garasch ga luege ob dä Schilter immer no da steit. U würklech äs isch ke Troum, äs isch üse.
Danke viumau
Liebi Schilterfründe, mir möchte üs no einisch rächt härzlech bi öich aune für die glungeni Überraschig u dä wunderschön restauriert Schilter 1000 bedanke.
Beschti Grüess
Evi u Steffu
